Арзиши миёнаи як метри мураббаъ хона дар ҷумҳурӣ ба ҳолати моҳи декабри соли 2024 705 доллари амрикоӣ (тақрибан 7812 сомонӣ) - ро ташкил кардааст. Дар ин бора Низом Мирзозода, раиси Кумитаи меъморӣ ва сохтмони кишвар имрӯз, 3-юми феврал, зимни нишасти хабарӣ иттилоъ дод.

Ба иттилои манбаъ, давоми соли гузашта дар кишвар 1 млн 739,6 метри мураббаъ хона ба истифода дода шудааст, ки ин бо нишондоди ҳамин давраи соли 2023 тақрибан баробар аст.

“Вобаста ба ҷойгиршавии ин ё он иншоот нархҳо тағйир меёбанд”, - гуфт раиси Кумита.

Аммо ӯ нагуфт, ки арзиши хона нисбат ба соли гузашта чанд пул гарон шудааст.

 

Низом Мирзозода
Акс аз Asia-Plus

 

Дар Душанбе арзиши хона қариб як баробар гарон шудааст

Низом Мирзозода дар нишасти ахири худ гуфт, ки дар Душанбе арзиши миёнаи як метри мураббаъ хона 780 доллар (тақрибан 8643 сомонӣ) мебошад.

Се сол пеш ин ниҳод арзиши як метри мураббаъ хонаро дар пойтахт 4 ҳазору 170 сомонӣ гуфта буд.

Яъне давоми се соли охир арзиши хона дар Душанбе таҷрибан як баробар зиёд шудааст.

Барои мисол:

- дар ноҳияи Фирдавсии пойтахт арзиши 1 метри мураббаъ дар биноҳои аз 7-ошёна боло 750 доллар (тақрибан 8310 сомонӣ)  ва аз он поён 650 доллар (тақрибан 7202 сомонӣ)  аст.

- дар ноҳияи Иисмоили Сомонии пойтахт боз ҳам гаронтар будааст. Арзиши 1 метри мураббаъ хона дар ин ноҳия ба ҳисоби миёна 850 доллар (тақрибан 9418 сомонӣ) аст. 

“Иншоотҳое, ки дар Ҷумҳурии Тоҷикистон сохта мешаванд, бо назардошти шароити хуби зиндагӣ тарҳрезӣ шуда, пешкаши сокинон мешаванд. Имконияти харидории шаҳрвандон низ васеъ шудааст, аз ин рӯ соҳибкорон низ аз ин истифода бурда, баъзан нархҳоро ба таври худашон мегузоранд”, - гуфт Низом Мирзозода.

Ба ақидаи раиси Кумита, дар дигар кишварҳо низ арзиши хона баланд аст. Масалан, арзиши як метри мураббаъ хона дар Ӯзбекистон 775 доллар, дар Озарбойҷон 1141 доллар, Қирғизистон аз 635 то 700 доллар, дар Қазоқистон 998 доллар, дар Молдова 912 доллар, дар Белорус 1544 доллар ва дар Русия аз ҳама гарон - 4042 доллар будааст.

Дар Telegram, Facebook, Instagram, OK ва ВК бо мо бимонед.