Сафари расмии сарвазири Тоҷикистон Қоҳир Расулзода ба Эрон рӯзи 17 феврал оғоз шуд. Дар ин бора АМИТ “Ховар” хабар медиҳад.

Маросими расмии истиқбол дар Теҳрон доир гардида, сипас дидору гуфтушуниди  Қоҳир Расулзода бо бо муовини якуми президенти Эрон, доктор Муҳаммадризо Ориф ва мулоқоти ҳайатҳои васеъ баргузор шуд.

Зимни мулоқт сарвазири ҷумҳурӣ таъкид дошт, ки Эрон дар низоми равобити  байналмилалии Тоҷикистон ҷойгоҳи хосса дорад.

Изҳори қаноатмандӣ карда шуд, ки соли равон дар доираи сиёсати муваффақонаи сарони кишварҳо Эмомалӣ Раҳмон ва Масъуд Пизишкиён ҳаҷми гардиши молу маҳсулот байни ду давлат афзоиш ёфта, муносибатҳо дар соҳаҳои мавриди таваҷҷуҳ ба таври назаррас густариш меёбанд.

Сурат: АМИТ Ховар

Зикр шуд, ки Тоҷикистон ва Эрон барои ҳамкории мутақобилан судманд дар соҳаҳои гидроэнергетика, саноати маъдан, сохтмон, хӯрока, дорусозӣ, нақлиёт, кишоварзӣ ва тиҷорату сармоягузорӣ имконоти фаровон доранд ва истифодаи самараноки ин имконияту захираҳо метавонад барои рушди ҳамкории байниҳукуматӣ дар соҳаҳои гуногун  заминаи воқеӣ гузорад.

Сурат: АМИТ Ховар

Имзои созишномаҳои нави ҳамкорӣ зимни сафари давлатии президенти Эрон ба Тоҷикистон  заминаи устувори равобити байниҳукуматӣ дар оянда маънидод гардид.

Дар идомаи мулоқот ба ҳукумати Эрон ҷиҳати дастгирии ташаббусҳои ҷаҳонии ҷониби Тоҷикистон изҳори сипосу миннатдорӣ карда шуд.

Ба иттилои расонаҳои Эрон, ҳамчунин Қоҳир Расулзода дар ҷараёни ин сафар ҳамчун меҳмони вижа дар Ҳамоиши сеюми иқтисодии Хазар, ки дар он сарвазирони Русия, Туркманистон, Қазоқистон ва Озарбойҷон барои муҳокимаи масъалаҳои ҳамкории минтақавӣ ва рушди иқтисодӣ ҷамъ мешаванд, ширкат мекунад.

Ёдрас мекунем, ки рӯзҳои 15-17 январи соли ҷорӣ сафари давлатии президенти Эрон Масъуди Пизишкиён ба Тоҷикистон баргузор шуд.

Аз рӯи натиҷаҳои гуфтушунидҳо дар сатҳи олӣ байни Тоҷикистону Эрон, ки бо иштироки сарони давлатҳои доир гардиданд, 23 санади ҳамкории дуҷониба ба имзо расид.

Айни замон 160 ширкат бо сармояи Эрон дар Тоҷикиситон фаъолият дошта, дар муқоиса бо солҳои пешин соли 2024 ҳаҷми ҳамлу нақли молу маҳсулоти миёни кишварҳо 3,2 баробар афзуд.

Дар ҷараёни форуми тиҷоратии кишварҳо рӯзи 15 январ дар Душанбе 13 санади ҳамкорӣ ба маблағи зиёда аз 450 млн доллар имзо шуд, ки ба гуфтаи Эмомалӣ Раҳмон, “боз як нишонаи мавҷудияти имкониятҳои васеи ҳамкорӣ барои соҳибкорон ва сармоягузорони мо мебошад”.

Натиҷаҳои сафари давлатии Масъуд Пизишкиён ба Тоҷикистонро Эмомалӣ Раҳмон ҳамчун “оғози марҳилаи нав дар рушд ва густариши муносибатҳои бисёрҷониба бо ин кишвари дӯсту бародар” арзёбӣ кард.

Дар Telegram, Facebook ва Instagram бо мо бимонед.