Дар соли 2024 шаҳрвандони Тоҷикистон барои дарёфти раводиди Шенген 4 ҳазору 19 дархост додаанд, ки ин қариб ба се соли давраи пандемия (2020-2022), ки дар маҷмуъ, 5944 дархост пешниҳод карда буданд, баробар аст.

Тибқи маълумоти "Schengen Visa Statistics", Тоҷикистон миёни беш аз 140 кишвар, ки барои раводид ба Аврупо муроҷиат кардаанд, дар ҷойи 93-юм қарор гирифтааст. 

Тамоюли афзоиши хоҳишмандони сафар ба Аврупо бо мақсадҳои дидори наздикон, таҳсил ва тиҷорат мушоҳида мешавад.

Кишвари Олмон самти ҷолибтарин боқӣ монда, ба консулгариҳои он бештар аз ҳама на танҳо шаҳрвандони Тоҷикистон, балки аз дигар кишварҳои Осиёи Марказӣ низ муроҷиат мекунанд.

Дар соли 2024 дар маҷмӯъ аз Осиёи Марказӣ беш аз 278 ҳазор дархости раводид пешниҳод шудааст:

- Қазоқистон – 179 446 (ҷойи 16-ум дар ҷаҳон);

- Ӯзбекистон – 58 691 (ҷойи 35-ум);

- Қирғизистон – 28 061 (ҷойи 47-ум);

- Туркманистон – 7831 (ҷойи 78-ум);

- Тоҷикистон - 4019 (ҷойи 93-юм).

Вале сатҳи радкунии раводидҳои "Шенген" дар соли гузашта дар тамом ҷаҳон ба ҳисоби миёна 14,56%-ро ташкил дод. Яъне қариб ҳар 7-умин дархост рад шудааст. Ҳамзамон, пардохти боҷи раводид дар ҳаҷми 80 евро  (каму беш 850 сомонӣ) дар сурати рад шудан, бозпас дода намешавад.

Аз панҷ кишвари Осиёи Марказӣ соли 2024 Иттиҳоди Аврупо аз ҳисоби пардохтҳои раводид беш аз 22 млн евро ба даст овардааст:

- Қазоқистон – 14,35 млн евро;

- Ӯзбекистон – 4,69 млн евро;

- Қирғизистон – 2,24 млн евро;

- Туркманистон – 626 ҳазор евро;

- Тоҷикистон – 321 ҳазор евро.

Ин маблағҳо раводидҳои имтиёзнок ва пешниҳоди такрориро дар бар намегиранд, аз ин рӯ, даромади воқеӣ метавонад боз ҳам зиёдтар бошад.

Дар соли 2024 шаҳрвандони кишварҳое, ки бо Иттиҳоди Аврупо низоми раводид доранд, танҳо барои дархостҳои радшудаи раводид зиёда аз 136 млн евро пардохт кардаанд.

Сабабҳои радкунии раводид метавонанд ҳуҷҷатҳои нодуруст, асосноксозии начандон қавии ҳадафи сафар ё набудани кафолатҳои молиявӣ бошанд.

Дар Telegram, Facebook ва Instagram бо мо бимонед.