Дар ин бора аз Вазорати молияи Тоҷикистон ба “Азия-Плюс” иттилоъ дода, гуфтанд, ҷанозаи марҳум вақти намози аср дар хонааш, воқеъ дар маҳаллаи Меҳробод (Калинин)-и пойтахт (рӯ ба рӯйи Мактаби байналмилалии президентӣ) баргузор мешавад.

Сабаби марги ӯ маълум нест.

Сафаралӣ Наҷмиддинов яке аз мансабдороне буд, ки солҳои дароз дар бахши молияи кишвар кор карда, то ба маснади вазирӣ расид. Ӯ барои муддати дароз, аз соли 2000 то соли 2013 вазири молияи Тоҷикистон буд.

Сафаралӣ Наҷмиддинов 20-уми ноябри соли 1951 дар ноҳияи Восеъ ба дунё омадааст. Соли 1973 Донишгоҳи давлатии Тоҷикистонро бо ихтисоси иқтисодчӣ хатм кардааст.

Солҳои 1973—1999 дар вазифаҳои гуногун дар Идораи савдои кумитаи иҷроияи Совети депутатҳои халқи шаҳри Душанбе, Вазорати савдо ва захираҳои моддии Ҷумҳурии Тоҷикистон кор кардааст.

Солҳои 1993—1994 муовини вазири савдо ва захираҳои моддии Тоҷикистон ва солҳои 1994—2000 муовини раиси Кумитаи давлатии қарордод ва савдои Тоҷикистон буд.

Охирин вазифае, ки ӯ кор кардааст, директори Агентии суғуртаи иҷтимоӣ ва нафақаи назди ҳукумати ҶТ буд. Ӯ дар ин вазифа аз соли 2013 то соли 2019 кор карда буд.

Ӯ бо ордени Шараф дараҷаи I сарфароз гардида, падари ду фарзанд буд.

Дар Telegram, Facebook ва Instagram бо мо бимонед.