Соли гузашта беш аз 2 млн 780 ҳазор шаҳрванди Тоҷикистон бо мақсади саёҳат, табобату таҳсил ва тиҷорат ба Ӯзбекистон рафтаанд, ки 2 млн 700 ҳазори он сайёҳ мебошанд. Дар ин бора Кумитаи омори Ӯзбекистон гузориш додааст.

Ба иттилои манбаъ, дар соли 2025 ба Ӯзбекистон дар маҷмӯъ 11,7 миллион сайёҳ ворид шуда, тоҷикистониён бо 2,7 миллион баъди Қирғизистон (3,3 млн) дар зинаи дуюм қарор доранд.

Дар ҳамин ҳол, тибқи иттилои Оҷонсии омори Тоҷикистон, соли гузашта 1 миллиону 117 ҳазору 800 шаҳрванди Ӯзбекистон ҳамчун сайёҳ вориди Тоҷикистон шудаанд. Ин теъдод беш аз 50% сайёҳони давоми сол ба Тоҷикистон омадаро фаро мегирад. Вале Оҷонсии омори Ӯзбекистон мегӯяд, соли гузашта 1,3 ӯзбекистонӣ ба ҳайси сайёҳ ба Тоҷикистон омдаанд.

Марзи Тоҷикистону Ӯзбекистон
Акс аз хабаргузории "Ховар"

 

Барои табобат, таҳсил ва тиҷорат

Тавре мақомоти Ӯзбекистон иттилоъ медиҳанд, теъдоди тоҷикистониёне, ки соли гузашта барои табобат ба Ӯзбекистон рафтаанд, 59 ҳазору 145 нафар аст. Ин ниҳод мегӯяд, соли гузашта аз ҳама бештар ба ин кишвар шаҳрвандони Тоҷикистон бо мақсади муолиҷа рафтаанд. Соли 2025 ба Ӯзбекистон ҳамагӣ 86 ҳазору 199 нафар барои табобат рафтаанд.

Манбаъ менависад, ки соли 2025-ум барои таҳсил ба ин кишвар 2 ҳазору 904 тоҷикистонӣ рафтаанд. Ба иттилои ин ниҳод, Тоҷикистон миёни кишварҳое, ки шаҳрвандонашон бештар барои таҳсил ба ин кишвар рафтаанд, пас аз Ҳиндустон (17 241 донишҷӯ) ва Туркманистон ( 9 349 донишҷӯ) дар ҷои сеюм қарор гирифтааст.

Ҳамчунин, ниҳоди мазкур чанде пеш хабар дода буд, ки Тоҷикистон дар байни давлатҳое, ки теъдоди зиёди донишҷӯёни ӯзбекистонӣ дар мактабҳои олияш таҳсил мекунанд, пас аз Русия ҷои дуюмро касб кардааст. Ҳоло дар мактабҳои олии Тоҷикистон 6 ҳазору 39 донишҷӯи ӯзбекистонӣ таҳсил мекунанд.

Барои тиҷорат бошад, давоми як соли гузашта ба Ӯзбекистон 17 ҳазору 962 шаҳрванди Тоҷикистон сафар кардааст. Тоҷикистониён баъди шаҳрвандони Афғонистон (415 577) аз ҳама зиёд чун тоҷир вориди ин кишвар шудаанд. Соли 2025 ба Ӯзбекистон дар умум 446 ҳазору 800 нафар барои тиҷорат сафар карда буданд.

Бояд гуфт, баъди ба сари қудрат омадани Шавкат Мирзиёев дар Ӯзбекистон ва сафари давлатии ӯ дар соли 2018 ба Тоҷикистону имзои санадҳои нави ҳамкорӣ бо Эмомалӣ Раҳмон, раисҷумҳури Тоҷикистон муносибатҳои байни ду кишвари ҳамсоя беҳ ва марзҳо боз шуданд. Аз он ба баъд, муносибатҳои ду кишвар дар соҳаҳои тиҷорат, сайёҳӣ, иҷтимоъ ва иқтисод низ бамаротиб рушд карда, ҳамасола ҳазорҳо сокинон ба кишварҳои ҳамдигар бо ҳадаафҳои гуногун сафар мекунанд.

Дар Telegram, Facebook ва Instagram бо мо бимонед.