Ҳукумати Тоҷикистон ба коркарди як катор конҳои бузурги канданиҳои фоиданок дар ҷумҳурӣ тендери байнулмилалӣ эълон карданист.

Тавре ба ОИ «Азия-Плюс» аз Кумитаи давлатии сармоягузорӣ ва идораи амволи давлатии ҷумҳурӣ хабар доданд, соли равон ҳукумат ният дорад, оид ба дастрас кардани ҳукуқи коркарди конҳои «Чоре» ва «Канчоч» дар ноҳияи Айнӣ тендери байнулмилалӣ баргузор намояд.

Бино ба иттилои манбаъ, кони «Чоре» кони тилову маъдан буда, кони «Канчоч» аз захираҳои тило, сурма, нуқра, симоб ва дигар канданиҳои фоиданок бой аст.

Ғайр аз ин, таъкид намуд манбаъ, ҳамчунин соли равон баргузор намудани тендерҳои байнулмилалӣ оид ба дастрас кардани ҳуқуқи баргузор намудани корҳои иктишофиву геологӣ дар конҳои «Гумас» ва «Икар» дар қаламрави Вилояти Мухтори Кӯхистони Бадахшон ба накша гирифта шудааст.

Бино ба маълумоти Кумитаи давлатии сармоягузорӣ, кони «Гумас» воқеъ дар ноҳияи Ванҷ дорои захираҳои бойи никел ва мису платина буда, кони «Икар» бо захираҳои ғании тило, волфрам ва мис начандон дуртар аз шаҳри Хоруғ ҷойгир шудааст.