Тоҷикистон ба Қирғизистон барои интиқоли барқ ба Афғонистон тавассути зеристгоҳи «Ойгул-Тош» шароит фароҳам меоварад, - гуфт зимни нишасти хабарӣ аз рӯйи натоиҷи сафар ба Туркманистон, Туркия ва Кореяи Ҷанубӣ нахуствазири Қирғизистон Омурбек Бабанов.

Бино ба маълумоти хабаргузории Tazabek.kg,  ин масъаларо ӯ бо нахуствазири Тоҷикистон Оқил Оқилов баррасӣ кардааст. «Ман ба Вазорати энергетикаву саноат дар ин хусус супориш додам. Ояндаи наздик дар ин бора гуфтушунидҳо оғоз мегарданд. Ин боз як имконияест барои интиқоли барқ ба хориҷи кишвар», -- изҳор доштааст ӯ.

Қирғизистон ва Тоҷикистон масъалаи сохтмони хатти интиқоли барқи 220 кВт аз зеристгоҳи «Ойгул-Тош» дар вилояти Ботканд то зеристгоҳи «Конибодом» дар вилояти Суғдро баррасӣ карданд.

Дар шарҳи ин масъала дар ширкати «Барқи тоҷик» изҳор карданд, ки дар масъалаи содироти барқи Қирғизистон тавассути зеристгоҳи «Ойгул-Тош» ба Афғонистон сухан сари ба истилоҳ ҷойивазкунӣ меравад, зеро ин тарзи содирот пешбинӣ мекунад, ки Қирғизистон ҳаҷми муайяни барқро ба минтақаи шимоли ҷумҳурӣ интиқол медиҳад ва сипас Тоҷикистон дар навбати худ, ин миқдорро ба Афғонистон интиқол хоҳад дод.