Мусофирони хатсайри ҳавоии Душанбе-Истамбул, ки аз ҷониби ширкати ҳавопаймоии «Тоҷик Эйр» анҷом дода мешавад, ба идораи ОИ «Азия-Плюс» занг зада, шикоят карданд, ки муддати 5 соат парвози ҳавопаймо мутаваққиф шудааст.

«Ба мо дар бораи сабаби таваққуфи парвоз чизеро шарҳ надода, ҳамчунин моро ба оби нӯшокӣ ва ғизо таъмин накарданд. Чанд маротиба вориди ҳавопаймоямон карданду боз аз он берун оварданд», - гуфтанд онҳо.

Дар робита ба ин масъала ба ОИ «Азия-Плюс» аз ширкати ҳавопаймоии «Тоҷик Эйр» иттилоъ доданд, ки бозистии парвози ҳавопаймо ба ниҳоят зиёд будани қабулу парвози ҳавопаймоҳо дар фурудгоҳи Истамбул вобаста будааст. «Ҳангоме ки ба парвоз иҷозат шуду мо мусофиронро ба ҳавопаймо ворид намудем, дар ҳавопаймо камбуди фаннӣ ошкор гардид ва баҳри таъмини амнияти парвоз зарурати бартараф кардани он ба миён омад. Аз ин рӯ, лозим омад, ки мусофиронро боз дар толори интизории парвоз ҷой диҳем. Айни замон камбуди фаннӣ бартараф шуда, ҳавопаймо ба парвоз омода аст», - гуфтанд дар ширкат.

Ҳамчунин намояндагони ширкати ҳавопаймоӣ таъкид карданд, ки мусофирон пас аз се соати таваққуфи парвоз бо ғизои гарм ва дар тамоми муддати интизорӣ бо оби нӯшокӣ дар шишаҳо таъмин карда шуданд.