Дар Вазорати энергетика ва саноати Ҷумҳурии Тоҷикистон вохӯрии Вазири энергетика ва саноати Ҷумҳурии Тоҷикистон Гул Шералӣ бо намояндагони Фонди Оғохон бо сардории Лутаф Қассам ва Озодхон Давлатшоев баргузор гардид.

Тавре аз хадамоти матбуоти Вазорати энергетика ва саноати ҷумҳурӣ иттилоъ доданд, дар вохӯрӣ масъалаҳои ҳамкориҳои дуҷониба дар соҳаи энергетика ва саноат, аз ҷумла ташкил намудани корхонаҳои дузандагӣ, коркарди меваю сабзавот, маҳсулоти ширӣ (саноатӣ), истеҳсоли қолинҳои дастӣ дар вилояти Хатлон ва ВМКБ, сохтмони як адад НБО-и хурд (1:2 мВт) дар вилояти Хатлон ва масъалаҳои вобаста ба АТИ-и НБО-ҳои Санобод ва Себзор ва ғайра мавриди баррасӣ қарор дода шуд.

Тавре Вазири энергетика ва саноати Ҷумҳурии Тоҷикистон Гул Шералӣ қайд намуд, Ҷумҳурии Тоҷикистон дорои захираҳои зиёди энергетикӣ, ашёи кишоварзӣ буда ин барои коркарди онҳо дар корхонаҳои саноатӣ имкон медиҳад, инчунин иброз гардид, ки густариш додани ҳамкориҳои дуҷонибаи мутақобилан судманд дар ин ва самтҳои дигар мувофиқи мақсад мебошад.

Ҷаноби Лутаф Қассам оид ба мавҷуд будани заминаҳои мусоид барои вусъат бахшидани ҳамкориҳо дар соҳаҳои зикршуда ибрози назар намуд.

Ҷонибҳо аз натиҷаҳои вохурӣ изҳори қаноатмандӣ намуда, ҳамчунин иброз доштанд, ки густариш додани ҳамкориҳо дар ин самт ба манфиати ҳарду ҷониб хоҳад буд.