Кишоварзони тоҷик нақшаи ҷамъоварии пахтаро дар соли равон ба иҷро расониданд. То имрӯз аз майдонҳои кишти пахтаи ҷумҳурӣ беш аз 401 ҳазор тонна ҳосили пунбадона ҷамъоварӣ карда шуд.

Тавре аз ахадмоти матбуоти Вазорати кишоварзии ҷумҳурӣ хабар доданд, дар вилояти Хатлон ҳудуди 270 ҳазор тонна (100%), вилояти Суғд – 112,6 ҳазор тонна (102%) ва навоҳии тобеи марказ – наздики 18,7 ҳазор тонна пахта ҷамъоварӣ карда шудааст.

Дар ҳамин ҳол, бо истифода аз обуҳавои мусоид кишоварзони ҷумҳурӣ ба ҷамъоварии ҳосили боқимондаи пахта идома медиҳанд.

Соли ҷорӣ дар майдони ҳудуди 200 ҳазор гектар пунбадона кишт шуда, нақшаи ҷамъоварии ҳосили пахта 401 ҳазор тоннаро ташкил медод. Қобили зикр аст, ки соли равон бинобар сабаби боронҳои пайдарпайи баҳорӣ оғози мавсими ғунучини ҳосили пахта ба муддати як моҳ дер афтод.

Соли гузашта пунбадона дар майдони 203 ҳазор гектар кишт шуда, 403 ҳазор тонна ҳосили пахта ҷамъоварӣ шуда буд.