Чанде қабл дар шаҳри Варшава ҷаласаи сеюми Комиссияи байниҳукуматии Тоҷикистону Лаҳистон оид ба ҳамкории иқтисодӣ баргузор гашт. Ҳайати Тоҷикистонро Муовини вазири рушди иқтисод ва савдои Ҷумҳурии Тоҷикистон, раиси қисмати тоҷикистонии комиссия Умеди Давлатзод ва ҳайати Лаҳистонро Муовини вазири иқтисоди ин кишвар, раиси қисмати лаҳистонии комиссия Анджей Диха раҳбарӣ карданд.

Тавре аз Вазорати корҳои хориҷии ҷумҳурӣ иттилоъ доданд, дар рафти ҷаласа ҳолат ва дурнамои ҳамкориҳои иқтисодии Тоҷикистону Лаҳистон мавриди баррасӣ қарор гирифта, самтҳои асосии ҳамкории ҷонибҳо дар соҳаҳои гуногун муайян карда шуданд.

 Зимни ҷаласа Созишномаи байниҳукуматӣ оид ба ҳамкорӣ байни Кумитаи кор бо ҷавонон, варзиш ва сайёҳии назди Ҳукумати Ҷумҳурии Тоҷикистон ва Вазорати варзиш ва сайёҳии Ҷумҳурии Лаҳистон ба имзо расид. Зери ин санад аз ҷониби Тоҷикистон Раиси кумитаи мазкур М.Неъматов ва аз ҷониби Лаҳистон Муовини вазири варзиш ва сайёҳии ин кишвар Катаржина Собирайска имзо гузоштанд. Бахши сайёҳӣ ҳамчун яке аз самтҳои афзалиятноки робитаҳои дуҷониба маҳсуб мешавад ва ин санад заминаи ҳуқуқиро барои рушди ҳамкориҳо миёни субъектҳои сайёҳии ду кишвар ва истифодаи иқтидори ҷонибҳоро дар ин соҳа таъмин хоҳад кард.

 Аз рӯи натиҷаи кори Комиссия Протоколи ҷаласаи сеюми Комиссияи байниҳукуматиро Тоҷикистону Лаҳистон ба имзо расид.