Дар зарфи 10 моҳи соли равон ҳаҷми содироти алюминии аввалия аз Тоҷикистон 221,5 ҳазор тоннаро ташкил дод, ки нисбат ба ҳамин давраи соли гузашта ба миқдори 12,3 ҳазор тонна камтар аст.

Тавре ба ОИ «Азия-Плюс» аз Вазорати рушди иқтисод ва савдои ҷумҳурӣ хабар доданд, маблағи содироти алюминий дар соли равон ба 448,5 млн. $ баробар шудааст (соли гузашта 629,2 млн. $).

«Дар муқоиса бо моҳи октябри соли гузашта қимати алюминий аз 2 ҳазору 688 $ то 2 ҳазору 026 $ поин рафт, ки сарфи назар аз коҳиши ҳаҷми начандон назаррас, ба маблағи умумии он бетаъсир намонд», - гуфтанд дар вазорат.

Ба иттилои манбаъ, дар моҳҳои январ-сентябри соли равон дар ҷумҳурӣ 210,7 ҳазор тонна алюминий истеҳсол карда шудааст, ки нисбат ба нишондиҳандаи моҳи октябри соли гузашта ба андозаи 0,2 фоиз зиёдтар аст.

Бино ба пешгӯии Вазорати рушди иқтисод ва савдо, соли равон ҳаҷми истеҳсоли алюминий дар ширкати «ТАЛКО» ба 387,6 ҳазор тонна хоҳад расид. Соли гузашта ширкат 349 ҳазор тонна алюминии авввалия истеҳсол карда буд.

Қобили зикр аст, ки рӯзи 26-уми ноябр дар бозорҳои ҷаҳонӣ қимати алюминий ба ҳисоби миёна 1 ҳазору 996 $ барои як тоннаро ташкил дод.