Дар доираи такмили фаъолияти фурудгоҳи Душанбе дар бахши хизматрасонӣ ба мусофирон, қарор шудааст, ки низоми нави автоматии бақайдгирӣ ва таъминоти барномавӣ комилан нав карда шавад.

Тавре ба ОИ «Азия-Плюс» сухангӯи Фурудгоҳи байнулмилалии Душанбе Муҳаммадюсуф Шодиев хабар дод, дар ин робита дар толорҳои хизматрасонии фурудгоҳ платформаи КЮТ УЛТРА ДИ СИ ЕС (CUTEULTRADCS)–ро насб карда шуд. «Платформаи мазкур ва  нуқтаҳои нави бақайдгирии муҷаҳҳаз бо техникаи муосир ва пешқадам ба ҳамаи ширкатҳои ҳавопаймоии бо фурудгоҳи Душанбе ҳамкоридошта имконият медиҳад, ки мусофирони худро тариқи низоми автоматии  хеш ба қайд гиранд», - иброз дошт вай.

Ба қавли М.Шодиев, барои идора намудани системаи нави бақайдгирӣ, ки ҳамакнун насбсозии он ба анҷом расидааст, мутахассисоне заруранд, ки тамомии дастгоҳҳоро идора намуда тавонанд.

«Бо мақсади омода намудани мутахассисон аз ширкати Рапискан муҳандиси коршинос ҷаноби Бену Бинепал даъват шуд ва раванди омӯзиш шурӯъ гардидааст. Алъон панҷ нафар кормандони Хадамоти истифодаи таъминоти радиотехникии алоқа бо таҳсил фаро гирифта шудаанд», - зикр кард ӯ.

Қобили зикр аст, ки ҷаноби Бинепал 63 сола буда, 37 сол таҷрубаи корӣ дорад. Тахассуси муҳандисиро дар Лондон азбар карда, дар 50 кишвари ҷаҳон корбарии системаи мазкурро омӯзонидааст. Дар кишварҳои Туркия,  Сурия, Либия, Қувайт, Дубай, Россия, Мексика ва минтақаи аврупоию ҳинду индонезӣ кор кардааст.