Дар Душанбе туҳфаи беҳтарини соли равон барои сайёҳон муайян карда мешавад. Муаллифони 9 адад маснӯот аз рӯи натоиҷи озмун миёни косибони Тоҷикистон интихоб карда шудаанд.

Тавре ба ОИ «Азия-Плюс»  аз Кумитаи ҷавонон, варзиш ва сайёҳии назди ҳукумати ҶТ хабар доданд, санаи 21-уми декабр ғолибони се ҷойи аввал бо диплом ва мукофотпулиҳо дар ҳаҷми аз 500 то 2 ҳазору 500 сомонӣ сарфароз карда мешаванд.

«Аз маҳсулоти 75 нафар иштирокчиёни ярмаркаи косибони Тоҷикистон, ки аввали моҳи декабр дар Маркази исмоилиёни пойтахт доир гардид, комиссия 9 адад маснӯоти беҳтаринро интихоб намуд, ки ба талаботи озмун ҷавобгӯ буда, хушсифату арзон ва симои миллӣ, таърих, фарҳанг ва табиати Тоҷикистонро таҷассум месозанд», - гуфтанд дар Кумита.

Ба иттилои манбаъ, соли равон ба рӯйхати туҳфаҳои беҳтарини сол гарданбанди нуқра, тоқӣ, ҷуробҳои помирӣ, шамъдон ва дигар маснӯот шомил гардиданд.

Зимнан зикр гардид, ки озмуни мазкур дар доираи нақшаи чорабиниҳо оид ба татбиқи Барномаи давлатӣ оид ба рушди сайёҳӣ дар Тоҷикистон барои солҳои 2010-2014 созмон дода шуд.