Бино ба маълумоти моҳи декабрии гузориши «Мониторинг ва огоҳии барвақтӣ дар Тоҷикистон», дар давоми моҳҳои октябр-ноябри соли равон аз Тоҷикистон ба Афғонистон 90,9 млн. кВт/соат нерӯи барқ интиқол дода шудааст.

Барои муқоиса – пойтахти Тоҷикистон шабонарӯзӣ аз 5 (моҳи июн) то 14 млн. кВт/соат (моҳи феврал) ва Ширкати алюминии тоҷик (ТАЛКО) шабонарӯзӣ 14-17 млн. кВт/соат нерӯи барқ истифода мекарданд.

Қаблан ширкати «Барқи тоҷик» изҳор дошта буд, ки Тоҷикистон ба Афғонистон шабонарӯзӣ камтар аз 3 фоизи миқдори умумии барқи истеҳсолнамуда дар кишварро интиқол медиҳад ва ин ба таносуби умумии таъминоти барқ барои аҳолӣ ва хоҷагии халқи кишвар тақрибан таъсире намерасонад.

Дар ширкат таъкид дошта буданд, ки интиқоли ин миқдори барқ барои дар зери шиддат нигоҳ доштани хатҳои интиқоли барқ ва таҷҳизот дар хатти интиқоли барқи «Сангтӯда-Пули Хумрӣ» ба хотири ғорат нашудани онҳо  ҳатмӣ мебошад.

Тибқи маълумоти Агентии омори назди президенти ҶТ, моҳҳои январ-ноябри соли равон Тоҷикистон ба маблағи умумии ҳудуди 19 млн. $ нерӯи барқ содирот намудааст, ки нисбат ба ҳамин давраи соли гузашта (3,6 млн. $) 5,2 маротиба зиёдтар аст.

Дар гузориши «Мониторинг ва огоҳии барвақтӣ дар Тоҷикистон» зикр мегардад, ки моҳи ноябри соли равон дар Тоҷикистон 1 млрд. 251 млн. кВт/соат ё худ дар як шабонарӯз 41,7 млн. кВт/соат нерӯи барқ истеҳсол шудааст. Моҳи гузашта ҳаҷми умумии истеъмоли нерӯи барқ дар ҷумҳурӣ 1 млрд. 210 млн. кВт/соатро ташкил додааст, ки нисбат ба моҳи ноябри соли гузашта 79 млн. кВт/соат камтар мебошад.