Чанде қабл зимни гуфтугӯи телефонӣ миёни нахуствазири Тоҷикистон Оқил Оқилов ва муовини аввали раиси ҳукумати Русия Игор Шувалов масоили марбут ба фаъолияти комиссияҳои байниҳукуматӣ оид ба ҳамкории иқтисодӣ ва ҳамчунин масъалаи ҷараёни таҳия ва имзои Созишнома дар бораи таҳвили маҳсулоти нафтии Русия ба Тоҷикистон бидуни боҷи содиротӣ баррасӣ шуданд.

Бино ба маълумоти Котиботи нахуствазири ҷумҳурӣ, зимни гуфтугӯ зикр гардидааст, ки лоиҳаи Созишнома дар бораи таҳвили маҳсулоти нафтии Русия ба Тоҷикистон бидуни боҷи содиротӣ бо назардошти пешниҳодоти ҳарду ҷониб омода гардида, ояндаи наздик масъалаи имзои он ҳаллу фасл мешавад.

Дар ҳамин ҳол, бино ба иттилои як манбаъи ОИ «Азия-Плюс» аз ҳукумати ҷумҳурӣ, рӯзи 17-уми январ ташрифи вазири корҳои хориҷии Русия Сергей Лавров ба Тоҷикистон дар назар аст ва аз эҳтимол дур нест, ки дар ҷараёни ин сафар созишномаи зикршуда ба имзо хоҳад расид.