Соли 2012 ҳиссаи умумии нахи пахта ва алюминий дар таркиби маҳсулоти содиротии Тоҷикистон ба таври қобили мулоҳиза коҳиш ёфт.

Бино ба маълумоти Вазорати рушди иқтисод ва савдои ҷумҳурӣ, ҳиссаи пахтаву алюминий дар маҳсулоти содиротӣ аз 70%-и соли 2011 то ба 56% дар соли 2012 поин рафтааст.

«Сабаби ин ҳархеласозии содирот аст. Дар таркиби содирот ҳиссаи маҳсулоти кишоварзӣ, текстил, консентратҳои минералӣ ва дигар маҳсулот афзуданд», - иброз доштанд дар вазорат.

Зимнан зикр гардид, ки ҳиссаи пахта дар таркиби маҳсулоти содиротӣ дар соли гузашта 16,5%-ро ташкил додааст, ки нисбат ба нишондиҳандаи соли 2011 ба андозаи 0,8% бештар аст, вале ҳиссаи алюминий ба таври назаррас – аз 54,6%-и соли 20111 то ба 39,5% дар соли 2012 коҳиш ёфтааст.

Қобили зикр аст, ки соли гузашта истеҳсоли алюминий дар Тоҷикистон ба андозаи 2% коҳиш ёфта, 272,5 ҳазор тоннаро ташкил дод.