Чанде қабл нахуствазири ҷумҳурӣ Оқил Оқилов оид ба масъалаи суръатбахшии корҳо дар сохтмони роҳи оҳани Душанбе-Қӯрғонтеппа дар қитъаи Ваҳдат-Ёвон машварати корӣ баргузор намуд.

Тавре ба ОИ «Азия-Плюс» сармушовири хадамоти матбуоти президенти ҶТ Субҳиддин Муҳиддинов хабар дод, дар ҷараёни машварат нахуствазир муҳим будани сохтмони ин қитъаи роҳи оҳан барои рушди иқтисоди ҷумҳуриро таъкид намуда, изҳор намуд, ки он ба афзоиши ҳаҷми боркашонӣ ва беҳбуди ҳамлу нақли маҳсулот тавассути роҳи оҳан дар минтақаи ҷануби ҷумҳурӣ шароити мусоид фароҳам меоварад.

Дар машварат зикр гардид, ки айни замон корҳои сохтмонӣ дар қисмати роҳи оҳани Ваҳдат-Ёвон мувофиқи реҷа идома дошта, чанде аз корҳои аввалиндараҷа ба итмом расидаанд.

Муҳиддинов қайд кард, ки Оқил Оқилов ба мақомоти раҳбарии вазоратҳои масъул ва КВД «Роҳи оҳани Тоҷикистон» ҷиҳати баррасии лоиҳаи бештар арзонтари сохтмони роҳи оҳан, андешидани тадбирҳо барои имзои шартнома ва ҷустуҷӯву дарёфти воситаҳо дар ҳамдастӣ бо сохторҳои масъули Чин супоришҳо дод.

Ёдрас мекунем, ки масофаи роҳи оҳани ояндаи қисмати Ваҳдат-Ёвони роҳи оҳани Душанбе-Қӯрғонтеппа 46 километрро ташкил медиҳад. Барои амалисозии лоиҳа зиёда аз 120 млн. доллари ИМА маблағ зарур аст. Ин роҳи оҳан бидуни убури қаламрави Ӯзбекистон минтақаи марказии кишварро бо вилояти Хатлон пайваста, масофаи роҳро 152 километр кӯтоҳтар мегардонад.

Қобили зикр аст, ки мувофиқи тарҳи фанниву иқтисодии лоиҳа, арзиши сохтмони роҳи оҳани Душанбе-Қӯрғонтеппа 130 млн. доллари ИМА-ро ташкил дода, дар чаҳорчӯби он сохтмони 18 пули хурду бузург ва 1 нақб бо дарозии 2340 метр пешбинӣ шудааст.