Шурӯъ аз 7-уми март ширкати ҳавопаймоии «Тоҷик Эйр» парвози ҳавопаймоҳо ба пойтахти Озарбойҷон – шаҳри Бокуро дубора барқарор мекунад.

Тавре ба ОИ «Азия-Плюс» аз ширкати мазкур хабар доданд, парвозҳо рӯзи панҷшанбеи ҳар ҳафта соати 22:30 бо вақти маҳаллӣ тавассути ҳавопаймои навъи Боинг-737 сурат гирифта, муҳлати парвоз 2 соату 30 дақиқа ва арзиши билет барои як тараф аз 240 евроро ташкил медиҳад. Парвозҳо аз Боку ба Душанбе субҳи рӯзи ҷумъаи ҳар ҳафта анҷом дода мешаванд.

Ба иттилои манбаъ, парвозҳо тавассути ин хатсайр танҳо аз ҷониби ширкати ҳавопаймоии Тоҷикистон анҷом дода мешаванд. Ширкатҳои озарбойҷонӣ алҳол аз анҷом додани парвозҳо бо ин хатсайр худдорӣ кардаанд.

Ёдрас мекунем, ки моҳи октябри соли 2012 ширкати «Тоҷик Эйр» парвози нахустини ҳавопаймо тавассути хатсайри Душанбе-Бокуро анҷом дода, вале бинобар сабаби норасоии мусофирон ва дархостнопазир будани хатсайр дарҳол парвозҳо қатъ шуда буданд.