Бонки миллии Тоҷикистон бо мақсади пурзур намудани унсурҳои ҳимоявии пулҳои коғазӣ бо қарори навбатии худ аз 5 марти соли равон пулҳои коғазии арзишашон 20, 50 ва 100 сомониро, ки дорои унсури ҳимоявии нав мебошанд, ба муомилот мебарорад.

Бино ба маълумоти хадамоти матбуоти БМТ, дар пулҳои коғазии номбурда, ки бо унсури ҳимоявии лазерӣ муҷаҳҳаз мебошанд, се адади охири рақами силсилавии пул дар рӯи навори кинеграмма бо тарзи лазерӣ чоп шудаанд, ба чашми оддӣ намоён гардида, ҳангоми ламс кардани ададҳои мазкур барҷастагӣ эҳсос карда мешавад.

Ба иттилои манбаъ, пулҳои коғазии дорои унсури ҳимоявии лазерӣ бо арзиши 20, 50 ва 100 сомонӣ дар қатори пулҳои ҳамарзиши намунаи соли 1999, ки дар муомилот қарор доранд, баробар гардиш менамоянд.