Имрӯз зимни вохӯрӣ бо занон президенти Тоҷикистон Эмомалӣ Раҳмон ба макомоти дахлдор супориш дод, ки лимити истифодаи барқ дар манотиқи ҷумҳурӣ комилан бекор карда шавад.

Тавре ба ОИ «Азия-Плюс» сухангӯи ШХСК «Барқи тоҷик» Нозирҷон Ёдгорӣ хабар дод, имрӯз, 7-уми март дар саросари кишвар реҷаи маҳдуди истифодаи нерӯи барқ пурра барҳам дода мешавад.

Сухангӯи ширкат хотиррасон намуд, ки даҳаи аввали моҳи октябри соли гузашта дар манотиқи Тоҷикистон реҷаи маҳдуди истифодаи нерӯи барқ ҷорӣ гардида буд. Дар моҳҳои декабр ва январ вобаста ба зиёд будани талабот бо нерӯи барқ, сокинони кишвар то 6-7 соат, шурӯъ аз 11 феврал то 9 соат, аз 25-уми феврал то 12 соат ва аз 5-уми март то 18 соат барқ мегирифтанд.

Н,Ёдгорӣ зикр кард, ки ин иқдом ба  нисбатан нарм омадани фасли зимистон ва бо реҷаи дуруст истифода бурдани захираи обӣ-энергетикии кишвар дар давраи тирамоҳу зимистони солҳои 2012-2013 марбут аст.

«Танҳо тайи чанд соли ахир бо мавриди истифода қарор гирифтани иқтидорҳои нави энергетикӣ, аз ҷумла нерӯгоҳи Сангтӯда-1, агрегати аввали нерӯгоҳи Сангтӯда-2 ва як қатор нерӯгоҳҳои хурди обиву барқӣ истеҳсоли нерӯи барқ дар кишвар қариб 1 ҳазор мегаватт зиёд шуд», - афзуд номбурда.