Ахири ҳафтаи сипаришуда дар Исломобод вохӯрии сафири Тоҷикистон дар Покистон Шералӣ Ҷононов бо раиси Ассотсиатсияи истеҳсолкунандагони сементи Покистон ва роҳбарони корхонаҳои бузурги сементи ин кишвар доир гардид.

Бино ба иттилои намояндагии Душанбе дар Исломобод, ҳайати Покистонро дар ин мулоқот таҳти сарварии роҳбари Ассотсиатсияи истеҳсолкунандагони сементи Покистон ҷаноби Калим Аҳмад Мубин, менеҷери кулли ширкати «Fauji cement» Муҳаммад Иқбол, менеҷерҳои ширкати «Askari cement»  Раҷа Ғаюр Ашраф, ширкати «Fecto Cement» Хофиз-ур-Рахмон, ширкати «Lafarge» Тариқ Маҳмуд Раҷа, ширкати «Lucky cement» Аҳмад, менеҷери кулли ширкати «Cherat cement» Аршад Хон ва роҳбарони корхонаҳои сементи «Kohat cement» ва «Maple Leaf cement» намояндагӣ карданд.

Ба иттилои манбаъ, дар ҷараёни мулоқот масоили истеҳсол ва таҳвили семент, сармоягузорӣ ба сохтмон ва мавриди истифода қарор додани корхонаҳои истеҳсоли семент, тақвият бахшидан ба робитаҳои иқтисодиву тиҷоратӣ, рушди зербинои васоити ҳамлу нақл ва транзити Тоҷикистон ва дигар мавзӯъҳои мавриди таваҷҷуҳи тарафайн баррасӣ шуданд.