Рӯзҳои 28, 29 ва 30-юми марти соли равон дар маҷмааи давлатии«Кохи Борбад» дар доираи лоиҳаи «Маҳсулоти беҳтарини сол» дар Тоҷикистон бо ширкати ҳудуди 30 корхонаи тавлидкунандаи маводи хӯрока Намоишгоҳ- фурӯши маҳсулоти хӯрока гузаронида мешавад.

Тавре аз ҶДММ «Оила» хабар доданд, дар Намоишгоҳ ташрифовардагон метавонанд маззаи  маҳсулоти иштирокчиёнро дар доираи лоиҳаи «Маҳсулоти беҳтарини сол»  бисанҷанд ва ҳамзамон   бо нархи дастрас онҳоро харидорӣ кунанд.  Маросими кушодашавии Намоишгоҳро роҳбарони Вазорати энергетика ва саноат, Палатаи савдо ва саноати ҶТ, масъули татбиқи лоиҳа ҶДММ «Оила»  ва дигар намояндаи ширкату корхонаҳои ҷумҳурӣ бо буридани лентаи рамзӣ ҳусни оғоз мебахшанд. Ҷои зикр аст, ки бори аввал беш аз 10 корхонаи тавлидоти маводи хӯрока аз вилояти Суғд дар ин намоишгоҳ иштирок мекунанд.

Ҳадаф аз баргузории лоиҳа дастгирии истеҳсолкунандаи ватанӣ, муаррафӣ кардани маҳсулоти онҳо, тарғиби брендҳои ватанӣ дар дохил ва хориҷи кишвар, дастгирии соҳибкорӣ ва ба ин васила  мусоидат ба рушди иқтисодиёт дар Тоҷикистон мебошад.

Нашрияҳои «Рекламная газета», «Оила» оҷонсии рекламавии «Тайрон» дар симои ҶДММ «Оила» соли дуввум аст, ки лоиҳаи мазкурро мавриди татбиқ қарор медиҳанд.

Имсол   лоиҳаи «Маҳсулоти беҳтарини сол» дар Тоҷикистон дар ҳамдастӣ бо Вазорати энергетика ва саноат ва Палатаи савдо ва саноати Ҷумҳурии Тоҷикистон сурат мегирад.

Озмун 1 октябри соли 2012 оғоз  ва  дар арафаи Ҷашни Наврӯз ҷамъбаст гардид. Ғолибон аз рӯи номгӯйҳо ба бахшҳо тақсим шуда, баҳодиҳӣ ба маҳсулоти онҳо аз рӯи се нишондод -   маззасанҷӣ, ки дар Марказҳои савдои шаҳрҳои Душанбе ва Хуҷанд баргузор гардида, дар онҳо муштариён назари худро нисбати маҳсулоти хӯрока баён намуданд,  баҳодиҳии мутахассисон ва баҳодиҳӣ аз тариқи рӯзномаҳо ва мактубҳои истеъмолкунандагон сурат гирифт.

Ғолибон санаи 30 марти соли 2013 дар меҳмонхонаи «Хаят Риҷенси Душанбе» дар фазои тантанавӣ ва идона бо Ҷоиза ва Диплом мукофотонида мешаванд.