Ахири ҳафтаи гузашта васоити ахбори умумии Туркманистон иттилоъ доданд, ки то соли 2010 Туркманистон ҳаҷми содироти нерӯи барқро 5 маротиба афзуда, миёни кишварҳое, ки он содирот мешавад, Тоҷикистон, Покистон, Арманистон ва дигар кишварҳо ҳузур доранд.

Дар ширкати «Барқи тоҷик» бар ин назаранд, ки роҳандозии интиқоли барқ аз Туркманистон ба Тоҷикистон шояд баъди пайваст шудани хатҳои интиқоли барқи дар Афғонистон бунёдгардидаи ҳарду кишвар имконпазир шаванд, зеро интиқоли он тавассути хатҳои барқи Ӯзбекистон айни замон ғайриимкон аст.

«Бо пайваст кардани хатти интиқоли барқи 500 кВ Марв (Туркманистон) – Андхой (Афғонистон) ва ХБИ 220 кВ Сангтӯда (Тоҷикистон) – Пули Хумрӣ (Афғонистон) метавон интиқоли барқ аз Туркманистгон ба Тоҷикистон ба роҳ монд, вале то ҷое, ки мо огаҳем, алҳол чунин нақшаҳо мавҷуд нест, вале шояд оянда воқеъӣ гардад», - гуфтанд дар ширкат.