Раҳбарияти КВД «Роҳи оҳани Тоҷикистон» ҳанӯз ба шарҳу тавзеҳи изҳороти роҳбари «Роспотребнадзор»-и Русия Геннадий Онишенко пас аз санҷиши қатораи хатсайри Душанбе-Маскав дар вилояти Астрахан омода нест.

Муовини аввали сардори КВД «Роҳи оҳани Тоҷикистон» Владимир Собкалов ба ОИ «Азия-Плюс» дар ин робита изҳор намуд, ки «ҳоло чизе маълум нест» ва шарҳе ҳам дода наметавонад. Ҳамчунин Собкалов аз шарҳи дар қатораи хатсайри Кӯлоб-Маскав дарёфт ва мусодира гардидани 4 кило героин ва ҳамчунин роҳбалади маводи нашъаовар истеъмолкарда низ худдорӣ варзид. «Мо дар ин самт кор бурда истодаем, вале чун ҳайат ҳоло барнагштааст, чизи мушаххасе дар ин хусус гуфта наметавонем», - афзуд ӯ.

Ёдрас мекунем, ки зимни боздид аз истгоҳи Ақсарайски вилояти Астрахан ноиби нахуствазири Русия Дмитрий Рогозин бо вазъи иншооти хадамоти марзбонӣ ва гумрук ошно гардида, ҳамроҳи роҳбари Роспотребнадзор Геннадий Онишенко бо вазъи қатораи Душанбе-Маскав низ шинос шудаанд.

Геннадий Онишенко аз вазъи хеле бади зиддисанитарии вагон-тарабхонаи қатора барошуфтааст, зеро ӯ дар паҳлӯи зарфҳо хобидани кормандони ҳайати қатораро мушоҳида кардааст.