Миёни Вазорати энергетикаи Тоҷикистон ва консорсиуми ширкатҳои олмонии DPU Investment GmbH ва ВАЕ Batterien GmbH дар соҳаи сарчашмаҳои барқароршавандаи энергия санади ҳамкорӣ ба имзо расид.

Бино ба иттилои сафорати Тоҷикистон дар Олмон, зери санад вазири энергетика ва саноати Тоҷикистон Гул Шералӣ ва директори ширкати DPU Investment GmbH Петер Урбан ва мудири ширкати ВАЕ Batterien GmbH Ян Айсперт имзо гузоштанд.

Дар намояндагии дипломатӣ зикр карданд, ки санади мазкур ба рушди минбаъдаи ҳамкориҳои судманд миёни Тоҷикистону Олмон дар бахши энергетика мусоидат хоҳад кард.

Ба иттилои манбаъ, дар Берлин Гул Шералӣ ҳамчунин бо ноиби президенти ширкати энергетикиии олмонии ANDRITZ Hydro Норберт Швартс низ мулоқот кард.

Гуфта мешавад, зимни мулоқоти мазкур масъалаҳои иштироки ин ширкат дар сохтмони нерӯгоҳҳои обиву барқӣ дар Тоҷикистон, таъмиру азнавсозии нерӯгоҳҳои амалкунандаи барқӣ ва ҳамчунин роҳандозии ҳамкориҳо дар таҳия ва амалисозии лоиҳаҳо ҷиҳати беҳбуди самаранокии энергетикӣ баррасӣ шуданд.