Фурудгоҳи байнулмилалии Душанбе (ФБД) аз фаъолият дар моҳи майи соли равон натиҷагирӣ намуд.

Тавре котиби матбуотии ФБД Муҳаммадюсуф Шодиев хабар дод, аз руи ҳисобҳои пешакӣ, дар моҳи майи соли 2013 фурудгоҳ ба 1284  рейсҳои дохилӣ ва берунӣ хизмат расонидааст. «Дар ин моҳ аз хизматрасониҳои фурудгоҳи Душанбе 95394 мусофир истифода кардаанд, ки аз ин шумора 37008 нафар мусофири омада ва 58386 нафар мусофири рафта мебошанд», - иброз дошт ӯ.

Ба қавли Шодиев, дар хатсайрҳои маҳаллӣ, ки асосан парвозҳо ба шаҳрҳои Хуҷанд ва Хоруғ сурат мегиранд, ба 316 рейс хизмат расонида шудааст. «Адади мусофирони омада 2331 ва рафта 2175 нафаро ташкил карда, дар маҷмӯъ дар хатсайрҳои маҳаллӣ ба 4506 мусофир хизмат расонида шуд», - афзуд сухангӯи фурудгоҳ.

Қобили зикр аст, ки Фурудгоҳи байнулмилалии Душанбе аз бузургтарин фурудгоҳҳои кишвар ба шумор рафта, шумори ҳамлу нақли мусофирон ҳамасола рӯ ба афзоиш мениҳад. Аз хизматрасониҳои ФБД солҳои 2010-1066450, 2011-1132911 ва соли 2012-1349164 мусофирон истифода кардаанд.