Зимни нишасти хабарӣ муовини вазири кишоварзии ҷумҳурӣ Суюнхон Рустамов изҳор намуд, ки майдони кишти пунбадона дар Тоҷикистон тадриҷан коҳиш меёбад, зеро бахши кишоварзии кишвар ба парвариши зироати навъҳои ҳархела мутобиқ гардонида мешавад.

«Яке аз сабабҳо поинравии нархи нахи пахта дар бозорҳои ҷаҳонӣ аст. Агар солҳои 2009-2010 нархи як тонна нахи пахта 5 ҳазор доллари ИМА-ро ташкил медод, пас имрӯз он то 1 ҳазору 700 доллари ИМА поин рафтааст. Айни замон пахта бо ҳамин нарх фурӯхта шуда, дар он пардохтҳои андоз ва хароҷоти ҳамлу нақл ба инобат гирифта нашудаанд», - шарҳ дод номбурда.

Рустамов гуфт, коҳиши  майдони кишти пахта маънои онро надорад, ки Тоҷикистон комилан аз парвариши пунбадона даст мекашад, зеро он зироати стратегӣ барои ҷумҳурӣ буда, ҷиҳати кашфу парвариши навъҳои нави пунбадона, ки дар майдони кишти начандон бузург ҳосили зиёд медиҳанд, кӯшиш ба харҷ дода хоҳад шуд.

«Тайи 2 соли ахир майдони кишти пунбадона аз 200 ҳазор то ба 191 ҳазор гектар кам шуданд. Дар Тоҷикистон заминҳои кишт начандон зиёд буда, ҳарчанд ҳамасола 1,5 ҳазор гектар заминҳои нав азхуд шаванд ҳам, ин нокофист», - гуфт ӯ ва зикр намуд, ки муддати 6-7 соли ахир Вазорати кишоварзӣ ба масъалаи интихоби кишти навъи маҳсулот аз ҷониби хоҷагиҳои деҳқонӣ дахолат накардааст.

Бино ба маълумоти Вазорати кишоварзии ҶТ, нимсолаи аввали соли ҷорӣ дар кишвар ба маблағи умумии 3 млрд. 845,5 млн. сомонӣ маҳсулоти кишоварзӣ истеҳсол шудааст, ки нисбат ба ҳамин давраи соли гузашта ба миқдори 12,1% зиёдтар аст. Суръати афзоиш дар бахшҳои рустанипарвариву чорводорӣ мутаносибан 18,3 ва 6,2%-ро ташкил додаанд.