- Созишномаи ҷудо кардани қарз аз ҷониби Чин барои сохтмони қисмати роҳи оҳани Ваҳдат-Ёвон (лоиҳаи роҳи оҳани Душанбе-Қӯрғонтеппа) рӯзҳои наздик ба имзо мерасад, - изҳор кард дар нишасти матбуотии имрӯза ба журналистон раиси КВД «Роҳи оҳани Тоҷикистон» Амонулло Ҳукуматулло.

Ба гуфтаи ӯ, маблағи умумии қарзи Чин 42 млн. доллари ИМА-ро ташкил хоҳад дод, ки 27 млн. долллари ИМА-и он ба сохтмони нақбу пулҳо дар ин роҳ масраф гардида, 15 млн. долллари ИМА-и боқимонда бевосита ба сохтмони роҳ равона хоҳанд шуд.

«Барои ҷалби сармоя ҷиҳати сохтмони ин роҳ мо бо ҷониби Чин як силсила гуфтушунидҳо анҷом додем ва ҳафтаи оянда дар бораи ҷудо гардидани воситаҳои дархостшудаи мо созишнома ба имзо мерасад», - зикр кард номбурда.

Бино ба маълумоти КВД «Роҳи оҳани Тоҷикистон», то имрӯз аз ҳисоби воситаҳои корхона 5 километри қисмати роҳи Ваҳдат-Ёвон бунёд шудааст, ки масофаи умумии он бояд 40,7 километрро ташкил диҳад.

Зимнан зикр гардид, ки дар маҷмӯъ корҳои сохтмонӣ дар беш аз 27 километри қисмати мазкур идома дошта, қисмати боқимонда дар марҳилаи лоиҳакашӣ қарор дорад.