Ду корхонаи ватанӣ ба сертификати меъёри «Ҳалол» соҳиб шуда, ояндаи наздик маҳсулоти онҳо бо ин тамға дар фурӯшгоҳҳо пешкаш хоҳад шуд.

Тавре ба ОИ «Азия-Плюс» сардори шуъбаи назорати давлатии меъёри Агентии стандартизатсия, метрология, сертификатсия ва нозироти давлатии Тоҷикистон Афзалшо Воҳидов хабар дод, сертификати «Ҳалол» ба коргоҳи ҳасиббарории «Амирӣ» (Душанбе) ва ҶДММ «Файзи Расул» (Хуҷанд) дода шудааст.

«Дар баъзе фурӯшгоҳҳо маҳсулоти гӯштӣ бо тамғаи «Ҳалол»-ро дидан мумкин аст, вале ин навъи маҳсулот алҳол дар мо истеҳсол намешавад ва корхонаҳои зикршуда баъди як-ду ҳафтаи дигар ба фурӯши маҳсулоти худ таҳти ин тамға шурӯъ мекунанд», - иброз дошт А.Воҳидов.

Ба қавли номбурда, айни замон ба 37 корхонаи ватанӣ барои гирифтани иҷозатномаи тамғаи «Ҳалол» шароитҳо фароҳам оварда шудаанд ва 14-тои онҳо барои дасрасӣ ба он дархост пешниҳод намудаанд.

Варианти тоҷикии иҷозатномаи тамғаи «Ҳалол» бо забонҳои тоҷикиву форсӣ ва англисӣ навиштаҷот дорад.