Зимни мулоқоти чанде қабли вазири рушди иқтисод ва савдои ҷумҳурӣ Шариф Раҳимзода бо сафири Озарбойҷон дар Тоҷикистон Аббосалӣ Гасанов масоили рушду таҳкими ҳамкориҳои иқтисодиву тиҷоратӣ миёни кишварҳо, аз ҷумла дар бахшҳои савдову ҷалби сармояи ширкатҳои озарбойҷонӣ ба иқтисоди Тоҷикистон, таъсиси корхонаҳои муштараки саноатӣ ва дигар масоили мавриди таваҷҷуҳи тарафайн баррасӣ шуданд.

Бино ба маълумоти намояндагии дипломатии Озарбойҷон дар ҶТ, дар вохӯрӣ атрофи ҷараёни иҷрои бевоситаи Созишномаи ҷонибҳо дар бораи савдои озод, тарофаҳои гумрукӣ ва боҷ барои маҳсулоти воридотӣ аз Озарбойҷон ба Тоҷикистон, ки миёни кишварҳо 5 сол пеш ба имзо расида буд, табодули назар сурат гирифта, зикр гардид, ки баҳри рушди муносибатҳои тиҷоративу иқтисодӣ ҷонибҳо ҳанӯз аз тамоми имконоти мавҷуда истифода намекунанд.

Шариф Раҳимзода пешниҳод намуд, ки дар пойтахти Тоҷикистон намоишгоҳ-фурӯши маҳсулоти ширкату корхонаҳои Озарбойҷон баргузор карда шавад.

Дар маҷмӯъ ҷонибҳо рушди муносибатҳои мутақобилан судманд миёни кишварҳо дар бахшҳои гуногунро қаноатбахш арзёбӣ намуданд.

Бино ба маълумоти Агентии омори назди президенти ҶТ, дар зарфи 8 моҳи соли равон ҳаҷми муомилоти молӣ миёни Тоҷикистону Озарбойҷон каме бештар аз 5,2 млн. доллари ИМА-ро ташкил додааст, ки дар муқоиса бо ҳамин давраи соли гузашта қариб 87% камтар ва пурра ба воридоти маҳсулот аз Озарбойҷон рост меояд.