Барои сохтмони нерӯгоҳи Роғун соли 2014 ҳукумат ният дорад, аз буҷети давлатӣ 1 млрд. 400 млн. сомонӣ маблағ ҷудо кунад, ки нисбат ба маблағи пешбинишудаи соли равон 33% бештар аст.

Дар лоиҳаи Буҷети давлатӣ барои соли 2014 зикр мегардад, ки аз ин маблағ 60 млн. сомонӣ (12,3% зиёдтар нисбат ба соли 2013) ба ихтиёри маъмурияти минтақае, ки зери об мемонад, гузошта мешавад.

Соли 2014 дар маҷмӯъ барои сохтмони асосӣ аз ҳисоби сармоягузориҳои мутамаркази давлатӣ ҷудо кардани 2 млрд. 723,2 млн. сомонӣ, аз ҷумла барои сохтмони иншооти иҷтимоӣ – 1 млрд. 30,2 млн. ва иншооти иқтисодӣ – 1 млрд. 468,7 млн. сомонӣ маблағ пешбинӣ гардидааст.

Бино ба маълумоти Вазорати молияи ҷумҳурӣ, лоиҳаи Буҷети давлатӣ барои соли 2014-ро ҳукумат маъқул шуморида, ҷиҳати баррасӣ ба парлумон пешниҳод кардааст. Дар навбати худ, то тасдиқ ва қабули он, парлумон ба ворид намудани тағйироту илова ба он ҳуқуқ дорад.