Дар ҷаласаи имрӯзаи палатаи поёнии парлумон аз лоиҳаи қонун «Дар бораи Буҷети давлатии Тоҷикистон барои соли 2014» ҷонибдорӣ карда шуд.

Зимни ҷаласа муовини раиси Кумитаи иқтисод ва молияи Маҷлиси намояндагони Маҷлиси Олии ҶТ Сафаралӣ Раҷабов дар ин робита изҳор намуд, ки дар ҷараёнии баррасии сеҳафтаинаи лоиҳа дар кумитаву комиссияҳои парлумон вакилон ҳеҷ тағйироту илова ба ин лоиҳа пешниҳод накардаанд.

Ҳангоми шарҳи буҷети соли ояндаи кишвар ба вакилон вазири молияи ҷумҳурӣ Сафаралӣ Наҷмиддинов зикр кард, ки чун солҳои пешин маблағи зиёди буҷет ба бахши иҷтимоии кишвар равона мегардад.

Ҳаҷми умумии Буҷети давлатӣ барои соли оянда 13 миллиарду 901 миллион сомонӣ (28,7% ММД) муқаррар гардидааст, ки нисбат ба Буҷети давлатии соли 2013 15,3% ё худ 1,8 миллиард сомонӣ зиёд мебошад. Касри буҷет дар ҳаҷми 242,1 млн. сомонӣ ба нақша гирифта шудааст.

Тибқи пешгӯиҳои ҳукумат, Маҷмӯи маҳсулоти дохилӣ (ММД) дар соли 2014 ба андозаи 48,5 миллиард сомонӣ, болоравии ҳаҷми истеҳсолот бо ифодаи реалӣ 7,6%, таваррум 7,5% ва индекси дефлятор 5,9% ба нақша гирифта шудааст.

«Мувофиқи ҳисобҳои мо, қурби асъори миллӣ нисбат ба доллари ИМА ба 4,84 сомонӣ барои 1 доллар баробар хоҳад буд», - гуфт вазир.

Ба қавли ӯ, соли оянда Тоҷикистон ҷалби сармоягузорӣ ба иқтисод дар ҳаҷми беш аз 2 млрд. сомониро ба нақша гирифта, барои хароҷот дар бахши иҷтимоӣ 7,7 млрд. сомонӣ маблағ пешбинӣ шудааст.