Дафтари Созмони амнияту ҳамкории Аврупо (САҲА) дар Тоҷикистон гузориш оид ба таъсири нерӯгоҳҳои хурди обиву барқӣ ба рушди иҷтимоиву иқтисодии водии Раштро пешниҳод кард.

Тавре ба ОИ «Азия-Плюс» аз Дафтари САҲА дар ҶТ хабар доданд, давоми моҳҳои март-октябри соли ҷорӣ дар ҳамдастӣ бо Маркази рушди нерӯгоҳҳои хурди Тоҷикистону Норвегия дар деҳоти Боқӣ Раҳимзода ва Тагоби ин водӣ таҳқиқот анҷом дода шуд.

Гурӯҳи коршиносон вазъи рушди ноҳияҳои дорои нерӯгоҳҳои хурд ва ҳамчунин имконоти гидроэнергетикии дарёҳои водии Раштро мавриди арзёбӣ қарор дода, бар асоси натоиҷи таҳқиқот ҷиҳати беҳбуди шароитҳои рушди иҷтимоиву иқтисодии минтақа ба мақомоти маҳаллии ҳокимияти давлатӣ тавсиҳо пешниҳод намуданд.

«Бо назардошти имконоти назарраси гидроэнергетикии кишвар, мебояд зикр намуд, ки ин ташаббус иқдоми муҳим дар роҳи рушди устувори Тоҷикистон мебошад», - гуфтааст Ханс Питер Ларсен, муовини роҳбари Дафтари САҲА дар Тоҷикистон.

Ба андешаи ӯ, барои манотиқи деҳот энергетика яке аз муҳаррикҳои асосии рушди саноат, бахши кишоварзӣ, нақлиёт ва телекоммуникатсия мебошад. «Вазъи воқеӣ дар масъалаи таъсири нерӯгоҳҳои хурд ба рушди минтақа, ки дар гузориш дарҷ ёфтааст, ба мақомоти маҳаллӣ ва ҳамчунин созмонҳои байнулмилалӣ дар таҳияи барномаи рушди устувори мамлакат кӯмак мерасонад», - иброз доштааст номбурда.

Дар семинари бахшида ба муаррифии гузориш беш аз 50 нафар намоянагони мақомоти давлатӣ, созмонҳои байнулмилаливу ғайриҳукуматӣ ва коршиносони бахши захираҳои обиву энергетика ширкат варзиданд.