Корпоратсияи байнулмилалии молиявӣ (IFC) бо корхонаи фаръии ширкати фаронсавии Conseils et Competences en Productions Animales (Гурӯҳи CCPA) дар бораи роҳандозии истеҳсоли комбикорм (ему хошоки омехта) дар Тоҷикистон лоиҳаи сармоягузорӣ ба имзо расониданист.

Тавре ба ОИ «Азия-Плюс» аз намояндагии IFC дар Тоҷикистон хабар доданд, истеҳсоли комбикорм дар Тоҷикистон бо мақсади таъмини хоҷагиҳои чорвопарварии маҳаллӣ бо навъҳои гуногуни хӯроки чорвои хушсифат, беҳбуди сифати ғизо ва солимии чорво ва ҳамчунин тақвияти рақобатпазириву хушсифатии маҳсулоти бахши кишоварзии ҷумҳурӣ роҳандозӣ мегардад.

«Бахши кишоварзии Тоҷикистон ҳудуди чоряки ММД-и кишварро истеҳсол намуда, беш аз 70%-и аҳолӣ дар деҳот ба сар мебарад ва истифодаи оқилонаи имконоти бузурги ин бахш, ба коҳиши мизони камбизоативу бекорӣ мусоидат мекунад», - гуфтанд дар намояндагии IFC.

Зимнан зикр гардид, ки имзои лоиҳаи сармоягузорӣ санаи 25-уми ноябр дар Душанбе дар назар аст.