То имрӯз хоҷагиҳои пахтакори кишвар ҳудуди 392 ҳазор тонна ҳосили пунбадона ҷамъоварӣ намуданд, ки 96,3%-и нақшаи пешбинишударо ташкил медиҳад.

Тавре аз Вазорати кишоварзии ҷумҳурӣ иттилоъ доданд, кишоварзони вилояти Хатлон аллакай то ахири моҳи октябр зиёда аз 270 ҳазор тонна ҳосили пахта ба даст оварда, аз уҳдаи иҷрои нақша баромада буданд.

Ба иттилои манбаъ, то имрӯз дар вилояти Суғд 107 ҳазор тонна ё худ 95%-и нақша ва дар навоҳии тобеи марказ 11,4 ҳазор тонна ё худ ҳамагӣ 48%-и нақша ҳосили пахта ҷамъоварӣ шудааст.

Бино ба маълумоти Вазорати кишоварзӣ, дар Тоҷикистон имсол дар майдони 192 ҳазор гектар пунбадона кишт шуда, ҷамъоварии беш аз 406 ҳазор тонна ҳосил дар назар аст. Соли гузашта пунбадона дар майдони ҳудуди 200 ҳазор гектар кишт шуда, 415 ҳазор тонна ҳосил ҷамъоварӣ карда шуд. Аз ин миқдор дар корхонаҳои ресандагиву бофандагии кишвар беш аз 10,2 ҳазор тонна пахта коркард шуд, ки ҳамагӣ 7,7% аз ҳаҷми умумии ҳосили ҷамъовардаро ташкил медиҳад.

Чун солҳои пешин имрӯз пахта ҳиссаи асосии маҳсулоти содиротии Тоҷикистонро ташкил намедиҳад. Масалан, дар моҳи сентябри соли равон Тоҷикистон ҳамагӣ 6 ҳазору 42,2 тонна нахи пахта ба хориҷи кишвар содирот кардааст, ки маблаги умумиаш ба 10 ҳазору 543,5 доллари ИМА баробар аст.