Рӯзҳои 3-4-уми декабри соли ҷорӣ намояндагони яке аз ширкатҳои бузурги истеҳсолкунандаи таҷҳизоти истихроҷи нафту газ ва дастгоҳҳои пармакунӣ дар Русия - «Уралмаш НГО Холдинг» аз Тоҷикистон боздид мекунанд.

Тавре ба ОИ «Азия-Плюс» аз Намояндагии тиҷоратии Русия дар Тоҷикистон хабар доданд, дар ҷараёни сафар баргузории маросими муаррифии маҳсулоти ширкат дар Палатаи савдо ва саноати Тоҷикистон ва ҳамчунин вохӯрӣ бо намояндагони мақомоти шаҳрдории Душанбе дар назар аст.

«Ғайр аз ин, мутахассисони «Уралмаш НГО Холдинг» аз чоҳи нафту гази майдони «Сариқамиш» боздид намуда, бо кори дастгоҳи пармакунӣ дар чоҳи «Шаҳринав-1п», ки ба дарозии чуқуртарини 6,5 ҳазор метр насб шудааст, аз наздик ошно мегарданд», - гуфтанд дар намояндагӣ.

Бино ба иттилои сомонаи расмии ширкат, моҳи июни соли 2010 ширкати «Уралмаш» ва гурӯҳи ширкатҳои United Capital Partners (UCP) дар бораи таъсиси бузургтарин ширкати истеҳсоли дастгоҳҳои пармакунӣ дар Русия - «Уралмаш Нефтегазовое Оборудование Холдинг» эълон интишор намуданд.

Фаъолияти «Уралмаш НГО Холдинг» ба лоиҳакашиву истеҳсоли ҳама гуна навъҳои дастгоҳҳои пармакунӣ ва пешниҳоди тамоми маҷмӯи хизматгузориҳо дар ин самт нигаронида шудааст.