Чанде қабл дар Вазорати рушди иқтисод ва савдои ҷумҳурӣ вохӯрии муовини аввали вазири рушди иқтисод ва савдо Неъматҷон Бӯриев бо Гуруҳи кории Вазорати тиҷорати Ҷумҳурии Мардумии Чин таҳти роҳбарии сардори Шуъбаи Департаменти кӯмаки берунаи вазорати мазкур ҷаноби Шэн Тутсзян оид ба таҷдиди роҳҳои дохилишаҳрии Қӯрғонтеппа- Кӯлоб баргузор гардид.

Бино ба иттилои хадамоти матбуоти Вазорати мазкур, дар оғози дидор Н.Бӯриев аз ҳамкориҳои густурда ва мутақобилан судманди дуҷониба изҳори қаноатмандӣ намуд.

«Дар ҷараёни мулоқот зикр гардид, ҳадафи асосии ташрифи ҳайати мазкур ба Тоҷикистон доир намудани мулоқот бо намояндагони вазорату идораҳои марбута, вобаста ба татбиқи лоиҳа оид ба таҷдиди роҳҳои дохилишаҳрии Қӯрғонтеппа – Кӯлоб аст», - омаддаст дар хабари вазорат.

Зимнан зикр мегардад, ки намояндагони ҳайати мазкур дар ҷараёни сафарашон, ҳамчунин аз маҳалли татбиқи лоиҳа дар шаҳрҳои Қӯрғонтеппа ва Кӯлоб боздид хоҳанд намуд.