Дар гузориш таҳти унвони «Таҳқиқоти монеъаҳое, ки бахши хусусии Тоҷикистон зимни содироти маҳсулот ва хизматгузориҳои худ ба бозорҳои ҷудогона дучор мешавад»-и Маркази тиҷорати байнулмилалӣ (МТБ) дар Тоҷикистон зикр мегардад, ки ширкатҳои содиркунандаи маҳсулоти нахи пахта ба Эрон ба мушкилоти назаррас мувоҷеҳ мегарданд.

Дар таҳқиқот шарҳ дода мешавад, ки ин мушкилот ба душвориҳои марбут ба пардохтҳои байнулмилалӣ ва талаботи танзими асъор дар Эрон алоқаманданд. «Ширкатҳои тоҷикистонӣ ба мушкилоти ҳисоббаробаркунии саривақтӣ барои маҳсулоти ба Эрон воридшуда дучор гардида, барои раҳоӣ ёфтан аз ин ҳолат, баъзе аз онҳо маҷбуран ба ҷойи пардохти пулӣ ба ивази маҳсулот (бартер) машғул мешаванд», - баён мегардад дар таҳқиқот.

Коршиносони МТБ таъкид месозанд, ки ин вазъ барои содироти маҳсулоти Тоҷикистон ба Эрон монеъаи ҷиддӣ эҷод мекунад ва «аксари ширкатҳои содиркунанда пас аз анҷоми як ё ду муомилот амалиёти содиротро қатъ мекунанд».

«Ҳарчанд ин масъала бо ташаббуси ширкатҳои содиркунандаи маҳсулоти нахи пахта мавриди таваҷҷуҳ қарор гирифта бошад ҳам, аммо танзими асъор ва пардохтҳо дар Эрон торафт бахшҳои зиёди содироти маҳсулот аз Эрон ба Тоҷикистонро фарм мегиранд», - гуфта мешавад дар таҳқиқоти таҳлилгарони марказ.