Тибқи пешгӯии ахири коршиносони Департаменти СММ оид ба рушди иқтисодӣ ва иҷтимоӣ, суръати афзоиши иқтисоди ҷаҳонӣ дар соли 2014 ба 3% ва соли 2015 ба 3,3 % мерасад. Соли равон ин нишондиҳанда каме бештар аз 2%-ро ташкил дод.

Коршиносон зикр кардаанд, ки Аврупо дар ниҳояти кор аз буҳрон раҳо ёфта, дар ИМА суръати афзоиши иқтисодӣ каме зиёд шудааст ва ба Чину Ҳиндустон муяссар гардидааст, ки коҳиши суръати афзоиши тайи ду соли охири ҷараёндоштаи иқтисодро боздоранд. Дар ин кишварҳо суръати афзоиш мутаносибан 7,5 ва 5%-ро ташкил хоҳад дод.

Гуфта мешавад, дар Русия соли 2013 бар асари коҳиши ҳаҷми истеҳсолоти саноатӣ ва сармоягузорӣ поинравии суръати болоравии иқтисод идома ёфта, соли 2014 афзоиши начандон қобили мулоҳиза дар ҳаҷми 2,9 фоиз дар назар аст.

Ёвари Дабири кулли СММ оид ба рушди иқтисодӣ Шамшод Ахтар зикр кардааст, ки дар бозори меҳнат пешравӣ ба мушоҳида нарасида, нишондиҳандаҳои бекорӣ ҳамоно коҳиш меёбанд. «Мо бештар аз рукуду беҳаракатӣ дар бахши талабот ва пешниҳод дар бозори меҳнат нигаронӣ дорем, ки бар асари он нишондиҳандаҳои бекорӣ хеле баланд боқӣ мемонанд. Дар аксари минтақаҳо мизони бекорӣ миёни ҷавонон ва қишри осебпазири аҳолӣ беҳад баланд аст», - гуфтааст номбурда.