Бо қарори ҳукумати Тоҷикистон, номи Корхонаҳои воҳиди давлатии «Заря Востока», «Востокредмет» ва «Тоҷиксемент» расман ба номҳои «Нури Ховар», «Металлҳои нодири шарқ» ва «Сементи тоҷик» иваз карда шуданд.

Ғайр аз ин, бо қарори ҳукумати кишвар, ба ҷойи Маҳмадсаид Зубайдов, собиқ директори корҳонаи «Сементи тоҷик»  Зайнулло Соҳибов директори коронаи мазкур таъин гардид.

Бино ба маълумоти ВАО-и тоҷик, роҳбари нави корхона Зайнулло Соҳибов бародари Шамсулло Соҳибов – язнаи президент Эмомалӣ Раҳмон буда, собиқ директори корхона Маҳмадсаид Зубайдов яке аз наздикони марҳум Асадулло Ғуломов, собиқ муовини аввали нахуствазири Тоҷикистон дониста мешавад.

Корхонаи «Сементи тоҷик» яке аз корхонаҳои бузурги истеҳсоли сементи ҷумҳурӣ маҳсуб ёфта, иқтидори лоиҳавии он истеҳсоли 1,1 млн. тонна семент дар як солро ташкил медиҳад.

Қобили зикр аст, ки собиқ сардори Раёсати мошинсозӣ, саноати бахши мудофиа ва кимиёи Вазорати энергетикаи ҷумҳурӣ Зиёдулло Носиров соли 2013 ба мансаби роҳбари корхонаи «Нури Ховар ва ҳамин сол собиқ директори корхонаи «Заря Востока» Қаюм Маҳмадов роҳбари корхонаи «Металлҳои нодири шарқ» таъин шуданд.