Дар муқоиса бо моҳи ноябри соли 2013 моҳи декабри соли гузашта ҳаҷми  истеҳсоли нерӯи барқ дар ҷумҳурӣ қариб 8% афзуд.

Бино ба маълумоти гузориши «Низоми мониторинг ва огоҳкуни пешакӣ дар Тоҷикистон», ки ҳар моҳ аз ҷониби Вазорати рушди иқтисод ва савдои ҶТ аз рӯи лоиҳаи Барномаи рушди СММ таҳия мегардад, моҳи декабр дар саросари кишвар 1 млрд. 418 млн. кВт/соат нерӯи барқ истеҳсол шудааст, ки нисбат ба нишондиҳандаи моҳи ноябр 42,4 млн. кВт/соат зиёдтар мебошад.

Дар ҳамин ҳол,  моҳи декабри соли гузашта ҳаҷми истеҳсоли нерӯи барқ дар муқоиса бо моҳи декабри соли 2012 ба миқдори 78,2 млн. кВт/соат камтар буд.

Моҳи декабр ҳаҷми умумии истифодаи барқ дар саросари кишвар ба беш аз 1 млрд. 368 млн. кВт/соат расидааст, ки нисбат ба моҳи ноябр 10,1% зиёдтар мебошад.

Моҳи декабри соли равон нерӯгоҳҳои «Сангтӯда-1» ва «Сангтӯда-2» ба кишвари ҳамсояи Афғонистон дар ҳаҷми 41 млн. кВт/соат нерӯи барқ интиқол додаанд, ки нисбат ба ҳамин давраи соли 2012 ба миқдори 17,4 млн. кВт/соат камтар аст.

Бино ба маълумоти Агентии омори назди президенти ҶТ, соли гузашта Тоҷикистон дар маҷмӯъ ба маблаги умумии 33,2 млн. доллари ИМА ба хориҷи кишвар нерӯи барқ содирот кардааст, ки дар муқоиса бо нишондиҳандаи соли 2012 қариб ба андозаи 56% бештар мебошад.

Ёдрас мекунем, ки бинобар сабаби коҳиши маҷрои дарёи Вахш ба обанбори Норак, аз охири моҳи октябри соли гузашта дар манотиқи кишвар реҷаи маҳдуди истифодаи барқ ҷорӣ карда шуд.