Соли 2013 дар Тоҷикистон 2 ҳазору 672,4 кило тилло истихроҷ гардид, ки нисбат ба нишондиҳандаи соли 2012 ба миқдори 273,5 кило зиёдтар буда, аз нақшаи пешбинишуда (2,5 тонна) барзиёд аст.

Зимни нишасти хабарии рӯзи 31-уми январ вазири саноат ва технологияҳои нави ҷумҳурӣ Шавкат Бобоев дар ин робита изҳор намуд, ки соли равон афзоиши иқтидорҳои КМ «Зарафшон» дар назар буда, коргоҳи нав бо иқтидори коркарди 10 ҳазор тонна маъдан дар як шабонарӯз ба истифода дода мешавад.

«Аз ҳаҷми умумии тиллои истеҳсолшуда дар Тоҷикистон соли гузашта 973,87 килояш ба хориҷи кишвар содир шуда, 370,92 килояшро Вазорати молия, 1 ҳазору 382,5 килояшро Бонки миллии Тоҷикистон ва 3,12 килояшро корхонаҳои истеҳсоли маснӯоти заргарӣ хариданд», - иброз дошт Ш.Бобоев.

Ба итилои вазир, соли 2013 КМ «Зарафшон 1 ҳазору 694,76 кг, КМ «Апрелевка» - 516,74 кг, корхонаи истеҳсоли тиллои «Тиллои тоҷик» - 364,90 кг, коргоҳи заршӯии «Одина – 167,62 кг ва дигар корхонаҳои хурд миқдори боқимондаи тиллоро истеҳсол кардаанд.

Зимнан зикр гардид, ки соли гузашта ҳаҷми истеҳсоли нуқра дар Тоҷикистон 1 ҳазору 832 килоро ташкил додааст, ки нисбат ба соли 2012 ба миқдори 64 кило зиёдтар буда, тамоми нуқраи истеҳсолшуда ба хориҷи кишвар бароварда шудааст ва танҳо 22,08 килояшро Вазорати молияи кишвар ва  92,51 килояшро корхонаҳои заргарӣ харидаанд.