Масъалаҳои рушди бонкинги мобилӣ (хизматрасонии фосилавии бонкӣ ё бонкинги электронӣ) ва дурнамои ҷорисозии он рӯзи панҷшанбеи ҳамин ҳафта дар Душанбе баррасӣ мешаванд.

Тавре аз намояндагии Корпоратсияи байнулмилалии молиявӣ (IFC) дар Тоҷикистон хабар доданд, дар ҷараёни чорабинӣ ба ин муносибат Корпоратсия натиҷаҳои таҳқиқоти тоза оид ба паҳншавии бонкинги мобилӣ мутобиқи усул ва меъёрҳои байнулмилалиро манзур хоҳад кард.

Ба иттилои манбаъ, дар таҳқиқоти мазкур хулосаҳо дар ин самт баррасӣ шуда, тавсияҳо оид ба беҳбуд бахшидан ба вазъи бозори молиявӣ тавассути тавсеъаи дастрасӣ ба захираҳои молиявӣ бо ёрии бонкинги мобилӣ пешниҳод карда мешаванд.

Хизматрасонии фосилавии бонкӣ (бонкинги электронӣ) –хизматрасоние мебошад, ки бо истифодаи воситаҳои барномавию техникӣ ва телекоммуникатсионӣ барои гузаронидани амалиёти бонкӣ, гирифтани иттилоот оиди бақияи маблағ дар суратҳисоби бонкӣ ва амалиёти гузаронидашуда, ба муштарӣ дастрасии фосилавиро ба суратҳисоби бонкии ӯ дар ташкилоти қарзӣ имконият медиҳад.