Зимни нишасти хабарӣ роҳбари Агентии зиддифасоди Тоҷикистон Фаттоҳ Саидов изҳор намуд, ки дар ҷараёни тафтиши фаъолияти молиявии воҳидҳои зертобеъи ширкати «Барқи тоҷик» далелҳои ба номи аҳолӣ сабт шудани қарзҳо аз истифодаи барқи корхонаҳои саноатӣ, асосан корхонаҳои хусусӣ ошкор шудаанд.

Ба гуфтаи ӯ, зимни санҷиши фаъолияти воҳидҳои зертобеъи ин ширкат дар ноҳияҳои тобеи марказ ошкор шудааст, ки дар ҳуҷҷатҳо қарзҳои аҳолӣ аз истифодаи барқ панҷ маротиба зиёд нишон дода шудаанд.

Ӯ зикр кард, ки дар ҷараёни санҷиши фаъолияти корхонаи «Система» дар вилояти Суғд далелҳои дуздии нерӯи барқ ба маблағи беш аз 1 млн. сомонӣ ошкор шудаанд. «Ман ваъда медиҳам, ки муддати ду-се моҳи минбаъда санҷиши далелҳои дуздии барқ дар ҷумҳурӣ ба итмом расида, гунаҳкорон муҷозот хоҳанд шуд», - иброз дошт Саидов.

Сардори Агентии зиддифасод ҳамчунин таъкид кард, ки соли гузашта дар низоми энергетикии кишвар 26 парвандаи ҷиноии марбут ба ришваситонӣ боз шудаанд.