- Сохтмони роҳи оҳани минтақавии Тоҷикистон-Қирғизистон-Қазоқистон-Русия алҳол танҳо як ниятест, ки дар барномаҳои дарозмуҳлати рушди бахши нақлиёти ин кишварҳо пешбинӣ шудааст, - изҳор кард зимни нишасти хабарӣ вазири нақлиёти ҶТ Хайрулло Асозода.

Ба гуфтаи ӯ, дар робита ба баррасии ин масъала танҳо як вохӯрии намояндагони мақомоти дахлдори кишварҳо дар шаҳри Маскав доир гардида, аз ин рӯ, чунин лоиҳа ҳам ҳоло вуҷуд надорад.

Асозода зикр кард, ки оид ба таҳияи Барномаи рушди бахши нақлиёт дар Тоҷикистон то давраи соли 20150 гурӯҳи корӣ таъсис дода шуда, дар ин барнома ҳамчунин як қатор бандҳои марбут ба рушди сохтмони роҳи оҳан дар сатҳи минтақавӣ низ дохил карда мешаванд.

Ёдрас мекунем, ки масъалаи имкони сохтмони роҳи оҳани мазкур моҳи майи соли гузашта зимни мулоқоти сарони кишварҳои чор давлат дар нишасти Созмони Аҳдномаи амнияти дастаҷамъӣ дар Бишкек баррасӣ шуда буд.

Ҳамчунин қаблан зикр гардида буд, ки идомаи сохтмони ин роҳ то кишварҳое чун Афғонистону Эрон ва Туркманистон низ аз эҳтимол дур нест.

Коршиносони маҳаллӣ бар ин назаранд, ки амалисозии лоиҳаи сохтмони роҳи оҳани Тоҷикистон-Қирғизистон-Қазоқистон-Русия ба бунёди боз як воситаи нақлиётӣ дар доираи низоми амнияти дастаҷамъӣ ва ҳамчунин ба дастёбӣ ба бозорҳои бисёр кишварҳои минтақаи Осиё имкон фароҳам меоварад.