Моҳи аввали соли равон мизони таваррум дар Тоҷикистон 0,4%-ро ташкил дод.

Бино ба маълумоти Агентии омори назди президенти ҶТ, моҳи январи соли 2014 нархҳо ба маводи ғизоӣ ба андозаи 0,4% ва хизматгузории пулакӣ ба миқдори 1% афзуда, арзиши маҳсулоти ғайриғизоӣ бетағйир боқӣ мондааст.

Ҳукумати Тоҷикистон ният дорад, ки сатҳи таваррум дар бахши истеъмолии кишвар дар соли равонро дар мизони 7,5% нигоҳ дорад.

Дар ҳамин ҳол, сатҳи таварруми соли гузашта дар ҷумҳурӣ сабтшуда – 3,7% аз ҳама пасттарин дар замони истиқлолияти кишвар мебошад. То ин замон сатҳи нисбатан пасти таваррум соли 2012 ба қайд гирифта шуда буд, ки 6,4%-ро ташкил дода буд.

Суръати миёнаи моҳонаи таваррум дар бахши истеъмолии ҷумҳурӣ дар соли гузашта 0,31%-ро ташкил дода буд. Дар соли 2012 ин нишондиҳанда ба 0,53% баробар буд.