Рӯзи 25-уми феврал дар Вазорати рушди иқтисод ва савдои Тоҷикистон вохӯрии вазир Шариф Раҳимзода бо ҳайати намояндагони Хазинаи байналмилалии асъор (ХБА) таҳти роҳбарии Ҷонатон Данн баргузор гардид.

Бино ба иттилои хадамоти матбуоти Вазорат, дар ҷараёни мулоқот ҷонибҳо атрофи масъалаҳои рушди иқтисодию иҷтимоии кишвар, алалхусус, нишондиҳандаҳои макроиқтисодии ҷумҳурӣ, ҳаҷми ММД ва сатҳи таваррум, фаъолияти анҷомдодаи вазорат дар шароити узвият ба Созмони Умумиҷаҳонии Савдо, суръати рушд дар соҳаҳои кишоварзӣ ва саноат, савдо ва хизматрасонӣ, бунёди корхонаҳои хурд ва миёна, истеҳсоли алюминий, нархи маҳсулоти ғайриозуқа, воридоту содироти маҳсулот, аз ҷумла, содироти маҳсулоти кишоварзӣ аз қабили меваю сабзавот, вазъи интиқоли пулӣ, фаъолияти бонкҳо ва низоми қарздиҳӣ мубодилаи афкори судманд намуданд.

Гуфта мешавад, дар интиҳои вохӯрӣ тарафҳо азми қавии худро ҷиҳати густариши минбаъдаи ҳамкориҳо дар самтҳои гуногуни иқтисод баён доштанд.