Рӯзи панҷшанбеи ҳамин ҳафта зимни мулоқоти муовини вазири рушди иқтисод ва савдои ҶТ Саидраҳмон Назриев бо роҳбари намояндагии Агентии Ҷопон оид ба ҳамкории байналмилалӣ (JICA) дар ҶТ Казуя Суэта ҷараёни амалисозии лоиҳаҳои муштараки Тоҷикистон бо ин Агентӣ баррасӣ шуданд.

Бино ба иттилои хадамоти матбуоти Вазорати рушди иқтисод ва савдои ҶТ, густариши ҳамкории судманд байни Агентӣ ва Вазорати рушди иқтисод ва савдо, ба курсҳои омӯзишии JICA бештар фаро гирифтани мутахассисони ҷавон, роҳандозии барномаҳои дигари таълимӣ аз мавзуъҳои асосии мулоқоти дуҷониба буданд.

Ба иттилои манбаъ, ҷонибҳо ҳамчунин, оид ба тадбирҳое, ки баъди узвияти Тоҷикистон ба Созмони Умумиҷаҳонии Савдо дар кишвар анҷом дода мешаванд ва дар ин замина бештар тақвият ёфтани ҳамкорӣ бо созмонҳои байналмилалӣ, афзун намудани иқтидори содиротии кишвар, алалхусус, дар соҳаи кишоварзӣ ва саноати коркард ибрози назар намуданд.