Дар зарфи се моҳи соли равон нархҳо ба маҳсулоти ғизоӣ (бо шумули машрубот) дар Тоҷикистон 1,6% боло рафтанд.

Бино ба маълумоти Агентии омори назди президенти ҶТ, дар семоҳаи аввал нархи карам – 74%, пиёз – 57%, сабзӣ – 18%, картошка – 17%, себ – 12%, гӯшти гӯсфанд – 2,1%, гӯшти гов – 1,6% ва биринҷ – 0,6% афзуд.

Ба иттилои манбаъ, давоми моҳҳои январ-марти соли равон нархҳо ба маҳсулоти ғайриғизоӣ дар маҷмӯъ бетағйир боқӣ монда, нархи бензин – 9,6% ва семент – 0,6% коҳиш ёфт. Дар ҳамин ҳол, арзиши як қатор маҳсулот боло рафт.

Гуфта мешавад, дар семоҳаи аввал нарх ва тарофаҳо ба хизматгузориҳои пулакӣ ба аҳолӣ ба андозаи 8,2% зиёд шуданд. Аз ҷумла, арзиши билетҳои ҳавопаймоӣ – 95%, хизматгузориҳои ҳаммом – 11%, обтаъминкунӣ – 8,2%, сартарошхонаҳо – 8,1% ва арзиши билетҳои роҳи оҳан – қариб 8% боло рафтанд.

Дар семоҳаи аввали соли ҷорӣ мизони таваррум дар бахши истеъмолии Тоҷикистон дар маҷмӯъ 2,4%-ро ташкил дод. Ҳукумати Тоҷикистон ният дорад, ки сатҳи таваррум дар бахши истеъмолии кишвар дар соли равонро дар мизони 7,5% нигоҳ дорад.

Дар ҳамин ҳол, сатҳи таварруми соли гузашта дар ҷумҳурӣ сабтшуда – 3,7% аз ҳама пасттарин дар замони истиқлолияти кишвар мебошад.